ازاي وقفت حماتي عند حدها

ازاي وقفت حماتي عند حدها قدام العيلة كلها يوم عيد ميلادها
تقول صاحبة القصة
حماتي جانيت عندها عاده مهببة.. وهي إنها تصلح لي نطقي وطريقة كلامي.. وكأني عيله صغيرة مبعرفش أتكلم ومحتاجة اللي يعلمني عشان متعلمتش كويس..
أنا في الأساس من بوسطن وهي من كونيتيكت.. وطبعا لهجاتنا مختلفة.. وده مخليها تتعامل مع لهجتي وكأني مش متعلمة وبحرج العيلة كلها..
كل عشا للعيله بدون استثناء بتقاطعني في نص كلامي من غير ما تديني حتى فرصة أكمل فكرتي وتصلح لي كلمة.. وتطلب مني أتكلم بشكل أوضح.. وإني محتاجة اشتغل على نطقي بشكل أفضل.. وأجرب أكرر الكلام الأول قبل ما أقوله قدام الناس..
بتعمل ده قدام أي وكل حد.. أخوات جوزي.. سلايفي.. ولادي الصغيريين..وحتى قدام الناس الغريبة.. زي اللي شغالين في مطعم أو سوبر ماركت..
جوزي بيقعد هادي ومش بيتدخل لأنه شايف إن دي شخصيتها ومش بتعمل معايا كده قاصده يعني.. حتى إنها كانت بتعمل معاه كده وهو صغير.

. كنت متأكده إنه متضايق ومش مرتاح من الموقف كله بس سلبي..
جوزي قالي إنه هو بيقلل كلامه فعلا في التجمعات العائلية.. عشان يتجنب التعليقات بتاعتها.. وتصحيحها لكلامه قدام الناس..
سكتت بس الموقف زاد سوء بالوقت.. الأسلوب اللي كان بيحصل في التجمعات بس بقى أسلوبها الطبيعي معايا في كل الأوقات.. وكأنها بتراقب كل كلمة بتطلع من بقي.. لدرجة إنها بقت تصلح لي كلامي وأنا بكلم ولادي.. ودي حاجة عصبتني جدا..
الشهر اللي فات في عيد ميلاد بنتي.. قاطعتني وانا بقرا للأطفال قصة.. الولاد كلهم كانوا باصين وهما مش فاهمين فيه ايه.. بنتي بعد عيد ميلادها سألتني هي ليه تيته بتعاملك وحش
للأسف أسلوبها عمل لي حالة توتر وقلق رهيبة.. بقيت أشكك في كل كلمة بقولها قبل ما اقولها.. بحاول أعدل لهجتي الأساسية عشان اتجنب التصحيح بتاعها..
جوزي طلب مني أتجاهل اللي بتعمله عشان معملش مشاكل.. بس بجد بقى مستحيل عليا إني استمتع بأي تجمع للعيله وأنا طول الوقت حاسه إنه ماشيه على قشر بيض..
القشة الأخيرة حصلت يوم الحد اللي فات.. في عيد ميلاد حماتشي ال.. كانت عامله عشا في واحد من المطاعم الكبيرة والغالية اللي هي اختارته بنفسها وعازمه العيلة كلها..
كنا كلنا متجمعين.. ومرة تانية صلحت لي كلامي بدون أي تردد.. كده قدام الكل..
قدام ابني اللي عنده 8 سنين.. قطاعتني في نص الجملة عشان تصلح لي نطقي لكلمة مايه.. تومي ابني كان باين على الانزعاج والغضب وسألني في ودني هي ليه تيته بتقاطع كلامك على طول وانتي بتحاولي تتكلمي
السؤال ده خلى حاجة جوايا تتحرك.. وقررت إني خلاص مش هسكت تاني.. بعد 15 دقيقه بالظبط.. جانيت بدأت تتكلم بحماس عن نادي الكتب الأسبوعي اللي بتحضره..
بس أنا أخدت بالي من حاجة.. جانت بتنطق كلمة فكرة غلط.. حسيت دمي كله بيغلي وانا سامعاها بتقولها غلط أكتر من 6 مرات..
ف ببساطة حبيت أدوقها من نفس الطبق اللي طفحتهولي سنين.. قررت إني أعمل نفس اللي كانت بتعمله معايا لسنين.. كل مرة كانت بتغلط وهي بتنطق الكلمة كنت بقاطعها فورا زي ما كانت بتعمل وبقولها حاجات زي اسمها فكرة يا جانيت.. فكرة انطقيها صح سهله.. اعتقد الكلمة اللي عايزه تقوليها فكرة صح.. تقصدي فكرة صح
الترابيزة كلها كانت ساكته.. لو أبره وقعت كنا سمعناها.. وجانيت وشها بقى أحمر.. وردت بطريقة دفاعية أنا.. أنا مش فاهمه انتي قصدك ايه أنا بتكلم صح
ابتسمت أكتر ابتسامه حلوه عندي وقولت لها بأكتر صوت بريئ أنا بس بساعدك عشان تتكلمي صح وبطريقة مناسبة يا جانيت.. مش هو ده اللي العيلة بيعملوه مع بعض أنا كنت فاكره إنك هتقدري مساعدتي ليكي عشان تباني مثقفة أكتر
مش عارفه إيه اللي زعلها!! أخدت شنطتها ومشيت قبل ما تكمل حفلة عيد ميلادها.. قالت إنها فجأة مبقتش حاسه إنها كويسه.. وسابت المطعم بدري ومشيت.. ومن ساعتها لا كلمتني والا كلمت جوزي!!.
جوزي بيقولي إني اتماديت وزودتها.. بس بصراحة هي كان لازم تدوق من نفس الطبق اللي أكلتهولي بأيدها لسنين..
تمت