سكريبت بقلم ريم خالد
_ أنتي طالق ..
نزلت الكلمة علي قلبي بفرحه فضلت بصاله وأنا دموعي بتنزل أني قدرت أتخلص منه وأخيرا وقفت قدامه وأنا بقوله ..
_ مش مسامحاك علي كل مره كسرتني فيها أو مديت أيدك عليا ولا هسامح ..
قولت الكلمة وأنا بخرج من عند المأذون بحرية وبضحك بفرحه كبيرة كانت الدنيا مطر شديد مكنتش حاسه بأي حاجه كنت بس حاسه أني عصفوره أخدت حريتها أخيرا جريت في الشارع وأنا بضحك والكل بيبص عليا بأستغراب وأنا مش مهتمه بنظرات حد وقفت في نص الطريق وأنا بحط طاقية الجاكت علي رأسي وبقفل الجاكيت كويس وبكمل جري عشان أوصل لبيتي وصلت أول ما خبطت سمعت صوت تيته الهادي أول ما فتحت
_ وحشتيني ..
_ ريم وحشتيني أوي أنتي كنتي فين..
مكنتش عارفة قد أي ومحدش فينا عايز يبعد عن التاني وهي بتقولي بفرحه ..
_ روحتي فين يا ريم أنا وجدك دورنا عليكي كتير قالولنا أن أنتي ومعاذ عزلتوا ..!
أخدت نفسي وأنا بقولها_ جوايا كتير هحكيه يا تيته بس لما جدو يجي ..
مسحت علي شعري
_ ماشي خشي ريحي شويه يحببتي أنا كل يوم بنضف أوضتك وببخرها وكمان لبسك في الدولاب علي ما أجهز الأكل يكون جدك جه وحشاني قعدتي معاكي ..!
ابتسمت وأنا بقولها _وحشني كلامي معاكي أوي يا تيته ..
_ هنقعد نتكلم لحد الصبح مش هسيبك تاني ..
ضحكت وأنا بقولها_ هتعمليلي أكل أي بقا ..!
ردت بحنية_ أنتي عايزة أي ..
_ عايزه الكشري الاصفر اللي أنتي بتعمليه ..!
ضحكت وهي بتقولي_ بس كدا من عنيا الأتنين..
دخلت أوضتي لسه دافية زي ما هي كل ركن فيها كنت مفتقداه حسيت أول ما دخلت كأن جدران الأوضة حاوطتني وهي بترحب
_ أنت بترحب بيا يعني ..!
فتحت بلكونتي كانت نضيفة بس المطر كان مغرق الدنيا لمست المطر بأيدي وبعدها دخلت غيرت لبسي لبيجامه شتوي وروحت في النوم بأمان لأول مره من زمان أحس بيه..
بعد وقت مش طويل صحيت علي صوت أذان المغرب وريحة أكل تيته وصوت المطر اللي بينزل في البلكونه بتاعتي أبتسمت وأنا بطلع من أوضتي كان جده قاعد علي الكنبة بعيد شويه سرحان في الجورنان بتاعه وتيته في المطبخ وعماله تنادي عليه وهو مش معاها خالص ...
_ تيته بتنادي عليك علي فكره ..!
_ قوليلها حاض..
قطع كلامه پصدمة وهو بيقوم يقف وبيبصلي بعدم تصديق قربت منه بأبتسامة واسعة ووقفت قدامه
_ أنتي بجد هنا .. ولا أنا ..
رديت بهزار_ أنا هنا يا عبد الرحمن..
بص لتيته اللي هزت رأسها وهي بتضحك وحسيت بدموعه وهو بيقولي..
_ أنا دورت عليكي كتير .!
_ أنا أسف بس مش ذنبي والله..
_ كنتي فين ومعاذ فين ..
شديته وأنا بقعد جنبه وتيته قعدت جنبي من الناحية التانية وهي بتبصلي بحنية أبتسمت بهدوء قبل ما أتكلم ..
_ معاذ مبقاش موجود في حياتي خلاص أطلقنا ..
شهقت تيته وهي بتحط أيديها علي بوقها پصدمة..
كملت كلامي _ شخصية زبا..لة مش بيعمل حاجه غير أنه
بيقلل مني ويعرف ستات عليا ولما كنت أجي أعترض يضر..بني علي طول شايف أنه مش بيغلط وأنه مهما غلط هو راجل ومن حقه ومحدش هيكلمه كان بيقعد يقولي أنا من حقي أعرف واحده وأتنين وتلاته
وقفت كلام وأنا بعيط جامد وبحط أيدي علي وشي حسيت بجدو اللي طبطب علي شعري بحنية وسمعت صوت عياط تيته
أتكلم جدو بهدوء_ قولتلك يا ريم مش دا الراجل اللي أتمنهولك كان مريض يابنتي تحكماته الزيادة فيكي وأنتي مكنتيش مراته لسه حتي ضربك قبل كدا وأنتوا مخطوبين وأنتي خبيتي لمجرد أنه ضحك عليكي بكلمة بحبك وبغير ..!
أتنهدت بحزن وأنا برد_ عندك حق يا جدو بس مراية الحب عامية مش عارفه حبيته أزاي او ازاي سامحته علي أول مره ضربني فيها كنت أنا الغلط ومحدش شال غلطتي دي غيري ومحدش دفع تمنها وغالي أوي برده غيري أنا كنت بخاف من صوت مفتاح الباب بتاعه وبخاف من خطوته بقيت بكره كل حاجه فيه كان بيقلل من كل حاجه بعملها يرمي الأكل علي الأرض لمجرد أنه مش علي مزاجه ويدور فيا الضړب بكل الحقد اللي جواه..
مسكت تيته أيدي وهي بتقولي ..
_ليه مقولتيش.. كونا طلقناكي منه من بدري ..!
مسحت دموعي وأنا بقولها _ لما طلبت أطلقك ضربني لدرجة أني أغمي ليا لما فوقت لقيت نفسي في مكان تاني غير بيتي وهو قاعد قدامي بيقولي بكل بجاحه أننا هنعيش هنا لما ڠضبت ورفضت ضربني تاني وكأني مش بحس أستسلمت للأمر الواقع عشان أعرف أخلص منه بعد شهرين طلبت منه أطلق للمره التانية وقبل ما يمد أيده قولتله أني مش عايزه حاجه منه ولا فلوس ولا مؤخر ولا حتي الشقة همشي وبس وأخيرا خلصت منه بعد معاناه مني ..
أخدت نفسي بهدوء وأنا ببتسم تلقائي أبتسمت تيته وهي بتطبطب علي خدي وبتقولي ..
_ أنسي أي حاجه خلاص أنتي دلوقتي وسطنا ومعانا هو صفحة وأتقفلت من يوم ما عرفته وأنا مكنتش مستريحاله بس كل ما أشوف حبك ليه أكدب أحساسي..
ضحكت وأنا بقولها_ أنتوا كان ليكوا نظرة
شدني جدو وهو بيقول بهزار ..
_خلاص بقا أنسيه وأنتي يا حياة يلا قومي هاتي الأكل بسرعة الواحد نفسه مفتوحة أنهارده عشان الغزال نور البيت من تاني ..
ضحكت وتيته قامت وقفت وهي بتقولي بسخرية ..
_ ضرتي رجعت تاني أهو ..!
ضحكنا أنا وجدو عليها وبعدها جدو أتكلم من تاني ..
_مش عايز الفترة اللي أنتي عشتيها دي تأثر عليكي فترة صعبة وعدت وأتعلمتي منها الكتير المهم دلوقت أنتي أرجعي لحياتك اللي أهملتيها أرجعي لموهبتك وأكتبي من تاني وأعمليلنا الآيس كوفي بتاعك اللي ميتشربش دا وأفضلي أقنعيني كل شويه أنه حلو وأنا أصدقك ..
ضحكت وأنا بقوله_ والله حلو أديله أنت فرصة ..!
ردت بأستهزاء_ هو حلو بس مش من أيدك ..
_عندك حق والله هو فعلا ميتشربش من أيدي ..
ضحكنا وبعدها أتجمعنا علي السفره في جو كله حنية وأمان وأحنا بنتفرج علي المسلسل وجدو يهزر معايا شويه ويتغزل في تيته شويه خلصنا أكل وعملت الشاى وقفت في البلكونه كانت الشوارع متغرقة من المطر والجو في لسعة برد قوية والناس ماشيه بتجري عشان يوصلوا لبيوتهم قبل ما الدنيا تمطر تاني..
_ وحشتك البلكونه ..!!
كان صوت جدو وهو بيحط شال علي
كتفي وبيقف جنبي وفي أيده كوباية الشاى ..
_مش بس البلكونه وحشني كل حاجه وحشني إحساس الأمان والحرية اللي كنت محرومه منهم وحشني وشوش الناس الطيبة دي كل دا كان غايب عني ..
أبتسملي بهدوء وبصينا للطريق من تاني بدأت الدنيا تمطر من جديد والشارع بقا فاضي من الناس بصيت للشارع لثواني وبعدها وجهت كلامي لجدو ..
_ممكن أنزل تحت .!
بصلي بأستغراب_
_ عشان خاطري سيبني يا جدو
