أخت جوزي بتكرهني ج2...... منى السيد

مروة! قالي الكارت اللي بخط إيدك يا طارق لأغلى واحدة دخلت حياتي.. هانت وهنكون سوا! وقالتلي الرسايل اللي بينك وبين أختك وأنتوا بتدبروا للجوازة دي في السر، عشان تبيعني بالرخيص وتدخل على شقة مفروشة وفلوس جاهزة، وتعملني أنا خدامة لعيالك في الشقة هناك، عشان مهدودة وغلابة ومبشتكيش!
الحاج جابر عدل نضارته بسرعة، وبص لطارق وبص لمروة بنظرة شكت في كل حاجة مين دي يا طارق؟ وإيه الكلام اللي بتقوله ده؟ دي مراتك اللي قولت إنها عند أهلها ومطلقة عملياً؟
طارق قرب مني بسرعة، وهو بيحاول يمسك دراعي ويزقني ناحية الباب عشان يداري الفضيحة، وصوته بيترعش بهستيريا واطية سمر، ابوس إيدك تعالي نطلع برة ونتكلم! متخربيش الدنيا، إنتِ مش فاهمة حاجة، والله العظيم كل ده عشانكم، عشان أوسع عليكم وعلى العيال! تعالي برة نتفاهم بالراحة!
نترت إيده بقوة خلت جسمه يترج لورا إيدك متلمسنيش! تتفاهم مع مين؟ مع الست المهملة المبهدلة اللي سايبها بتموت بالأنيميا وتستخسر فيها شريط دوا بعشرين جنيه وبامبرز للعيال؟ بتوسع علينا بطقم دهب لتاني واحدة في حياتك؟ بتوسع علينا بشقة في فيصل ونص ورشة وأنت سارق شقا أبويا وواكل حقي وحق عيالي؟
هناء العروسة وقفت، وشها اتخطف وبصت لطارق بقرف وصدمة أنت كداب يا طارق؟! أنت قولتلي إن مراتك ست معندهاش أصل ورمتلك العيال وراحت عند أمها وإنكم منفصلين بقالكم سنة ومستنيين إجراءات الورق تخلص! وقولتلي إن طقم الدهب ده من شقاك ومن حر مالك جاي تقدري بيه قدام أهلي!
مروة اتدخلت بصوت عالي وهي بتزعق ومحروق دمها، وبتبص لهناء ولأبوها عشان تنقذ البيعة يا هناء يا حبيبتي متصدقيهاش! دي ست حرباية، دي ست نايمة طول النهار ومبتعرفش تراعي بيتها ولا جوزها، خلت أخويا عايش في قرف وجاي تدمر فرحته عشان غيرانة ومغلولة! الشرع محلل أربعة، وأخويا راجل ومن حقه يتجوز، والراجل مجرمش ولا عمل حاجة غلط!
بصيت لمروة، وضحكت.. ضحكة باردة وطويلة خلت مروة تسكت وتبلع ريقها برعب. قربت منها خطوة، وبصيت في عينيها اللي كانت بتهرب مني يمين وشمال الشرع يا مروة؟ إنتِ اللي بتعرفي الشرع؟ الشرع اللي بيقولك ادخلي بيت أخوكي الصبح وعايري مراته بمرضها وضعفها؟ الشرع اللي بيخليكي تحطي الشبكة ورا كنبتي وتستغفلي تعبي وتخططي لأخوكي إزاي يرميني ويرمي عياله عشان تلمي مصالح من وراه؟ الشرع اللي بيقول للراجل اتجوز على مراتك وخبي عليها واصرف دم قلبك على الزينة وسيب ولادك مش لاقيين ياكلوا؟
طلعت من شنطتي ورقة وصل الأمانة، وحطيتها على مكتب المأذون ورزعت كفي عليها ده وصل أمانة بميتين ألف جنيه، كان طارق ماضيه للمرحوم أبويا يوم ما جه يتسول منه تمن خشب الورشة. الورشة اللي المفروض إنه كبر منها وبقى عريس الغفلة. والوصل ده واجب النفاذ بكره الصبح في النيابة، يعني عريسك يا ست هناء طالع من عند المأذون على الحبس تلات سنين مع الشغل والنفاذ!
المأذون رفع الورقة، بص فيها، وهز راسه بضيق وبص لطارق الكلام ده صحيح يا أستاذ طارق؟ أنت عليك إيصالات أمانة وديون للأسرة دي؟
طارق حط إيديه الاتنين على راسه، وقعد على أقرب كرسي كأن الهوا اتسحب من صدره، وقال بنبرة عياط وذل سمر.. متعمليش كدة.. أرجوكي، عشان خاطر حمزة ونور.. أنا غلطت، والله العظيم غلطت، الشيطان ومروة عموني، قالولي إنتِ مش حاسة بيا وإن الجوازة دي هتفك زنقتي وهتعملي اسم.. متودينيش في داهية يا سمر!
مروة صرخت فيه بغل أنت بتوطي راسك قدامها ليه يا طارق؟! أنت بتشهد الناس على خيبتك؟! دي متقدرش تعمل حاجة، ورقة إيه وبتاع إيه دي عيلة من غير ظهر ومالهاش حد!
رفعت وشي، وبصيت لمروة بكل كبرياء أنا مليش حد؟ أنا ربنا معايا، ومعايا حق أبويا اللي رباكي وصرف عليكي أنتي وأخوكي يوم ما مكنتوش لاقيين تاكلوا! وعندي لسان يجيب حق عيالي من عين أتخن راجل فيكم! والورقة دي مش لوحدها يا مروة.. عقد الشقة اللي إحنا قاعدين فيها، أبويا كاتب نصه باسمي ومثبت في الشهر العقاري، والتمكين هيتعمل بكره الصبح بحكم إني حاضنة للتوأم، يعني أخوكي ملوش فيها بلاطة واحدة، ولو رجليه عتبت عتبتها هطلعلوا نجدة تحبسه!
الحاج جابر قام وقف فجأة، ورزع كف إيده على ترابيزة المكتب برنة هزت الحيطان، وبص لطارق ومروة بنظرة احتقار عمري ما شوفت زيها بس! اخرسوا خالص! قلة أصل وخسة وندالة، جاي تضحك عليا وعلى بنتي وتعمل نفسك شقيان وشاريني، وأنت سارق شقا مراتك وواكل حق عيالك ونازل تتجوز عليهم بفلوس أهلها؟ والله ما فيك ريحة الرجولة، ولا أختك شافت ريحة التربية!
بص الحاج جابر لبنته هناء وقالها بحزم امشي قدامي يا هناء.. اطلعي برة.. دي عيلة متدخلش بيوتنا ولا يتشرف بيهم حد، ده إحنا ربنا نجانا من مصيبة سودة كان هيلبسنا فيها!
هناء لمّت شنطتها وبصت لطارق وهي بتبصق على الأرض جنبه خسارة فيك البدلة اللي لابسها، ربنا ينتقم منك ومن أختك الحرباية دي.. روحي يا شيخة منك لله إنتِ وأخوكي!
خرج الحاج جابر وبنته والشهود اللي معاهم، ورزعوا وراهم الباب، وسابوا الأوضة تلف بطارق ومروة.
المأذون قفل دفتره بهدوء، وشال نضارته، وبص لطارق بجمود اتفضلوا يا حضرات.. المكتب هنا بيعقد الجواز الشرعي مش بيستر على النصب