جوزي عنده محل بقالة في بيت عيلة 2 .... اماني سيد

وقفت مكاني مش قادرة أنطق، ريقي نشف وبصيت للمعلم شوقي ودفتر الفواتير اللي في إيده كأنه حبل مشنقة ملفوف حوالين رقبتي. المحل ورايا بيصفر، الهوا داخل طالع بين الأرفف الفاضية، والراجل واقف بطوله وهيبته مستني يسمع رنة الفلوس مش تنهيدات القهرة.
المعلم شوقي رمى نظرة سريعة على كراتين الشيبسي المفرغة والتلاجات المطفية، ونزل نضارته الطبية على طرف مناخيره وقال بصوت جهوري ها يا سمر؟ إحنا اتفقنا على النهاردة، قولتِ أسبوع يا معلم وأكون لميت الحساب من السوق والزبائن، والنهاردة الأربع، الأسبوع خلص بالتمام والكمال.. فين السبعين ألف جنيه؟ أنتي عارفة إن جمال جوزك قبل ما يسافر ماضي على شيكات وكمبيالات على بياض، وأنا لو رفعت ورقة واحدة منها في المحكمة مش هيرجع من سفره ده غير على السجن، وانتي هنا في وش المدفع!
الكلام نزل عليا زي مية باردة في عز طوبة، حسيت بدوخة ومسكت في طرف الفاترينة الخشب عشان ما أقعش. الشيكات على بياض؟ جمال مأمنش عليا بقرش، وسايب شيكات مفتوحة للتاجر؟ بلعت ريقي بصعوبة وقولتله وأنا بحاول أجمع كل ذرة ثبات في صوتي اتفضل اقعد يا معلم شوقي، اقعد واشرب كوباية شاي وأنا هفهمك كل حاجة بالورقة والقلم.
بصلي بقرف وقال شاي إيه يا بنتي! الشاي ده لما نكون بنحاسب، أنا مش جاي أضايف، أنا جاي ألم حق بضاعتي ورايا التزامات ومصانع، أنتي شايفة السوق عامل إزاي؟ السكر كل يوم بسعر والزيت طالع في العالي والشركات مبتصبرش على حد، اديني فلوسي وأنا ألف وشي وأمشي، غير كده ورق جمال هيطلع على النيابة دلوقتي حالا.
في اللحظة دي، دخل الحاج إبراهيم صاحب الفرن، كان لسه واقف على أول الحارة وشاف المعلم شوقي وهو داخل وسمع صوته العالي. دخل الحاج إبراهيم بجلابيته البيضا وابتسامته الهادية ومد إيده يسلم على التاجر صلِ على النبي يا معلم شوقي، هدي سرك شوية، الست في بيتنا ومفيش مليم هيضيع عليك، ادخل اقعد والرجالة تتكلم بهداوة.
المعلم شوقي احترم سن الحاج إبراهيم، اتنهد وقعد على الكرسي الخيزران اللي جنب الباب، وقال عليه أفضل الصلاة والسلام يا حاج إبراهيم، بس أنت عارف أكل العيش مفيهوش مجاملات، المحل فاضي خالص، والست باين عليها صفت البضاعة ومفيش سيولة، وأنا كده فلوسي بتضيع.
طلعت من ورا الفاترينة، وشيلت الدفتر بتاعي، دفتر مسطر قديم كنت بكتب فيه كل حبة ملح وكل علبة تونة خرجت من المحل، حطيته على الترابيزة قدام المعلم شوقي وفتحت الصفحات. قولتله وصوتي مكسور بس مليان وجع بص يا معلم شوقي.. المحل ده متصفاش بيع في الشارع، المحل ده اتنهب في بطون أهله. شوف التواريخ دي، شوف الصفحة دي كده.. من يوم ما جمال ركب الطيارة وسافر، وحماتي بتنزل تشيل كراتين الزيت والسكر والشاي، سلايفي كل أسبوع شيلتين وحطتين منظفات وجبن ولحوم مجمدة من التلاجة، محروس أخو جوزي ساحب سجاير وعزايم بتمانية آلاف جنيه لوحده! البضاعة اللي أنت بتطالب بفلوسها خرجت من هنا دخلت الشقق اللي فوق راسي، دخلت مطابخهم وبطونهم، وأنا هنا كنت باخد الفتات عشان أأكل بيه عيالي، ولما جيت أطالب بحقي وحقك بهدلوني وطردوني ومدوا إيدهم عليا والشارع كله يشهد!
المعلم شوقي مسك الدفتر وقعد يقلب فيه بتركيز، عيونه كانت بتوسع مع كل سطر وكل رقم، بص للحاج إبراهيم وقال ده كلام ده يا حاج؟ يعني جمال مسافر وأهله بياكلوا في لحم المحل على حسابي وحساب شقا الراجل؟ ده استهبال وقلة أصل!
الحاج إبراهيم هز راسه بأسى وقال للأسف يا معلم، البيوت أسرار، والست دي والله شالت فوق طاقتها، وكانت ساكتة عشان تحافظ على بيتها لحد ما الفاس وقعت في الراس، بس ده ما يمنعش إنك تاخد حقك، وفي نفس الوقت ما تكسرش ظهر الست دي، دي أم عيال وجوزها متغرب.
بصيت للمعلم شوقي وقولتله بقرار حاسم كنت فكرت فيه طول الليل اسمعني يا معلم شوقي، أنا مش ههرب ولا هسيب المحل، وأنا مش خايفة من الشيكات لأن اللي غلط هو جمال اللي وثق في أهله وسابني في النار، بس أنا ست أصيلة وما أرضاش لبيتي يتخرب ولا أقبل عيالي يتيتموا وأبوهم مسجون.. أنا عندي حل يرضيك ويوقفني على رجلي.
سكت المعلم شوقي وقفل الدفتر ورماه على الترابيزة وقال باهتمام قولي يا سمر، سمعك.
قولتله أنت هتديني مهلة شهرين، بس مش مهلة وخلاص.. أنت هتنزل لي بضاعة جديدة بتمانين ألف جنيه تانية!
المعلم شوقي اتنطر من على الكرسي كأنه اتلسع، وصرخ بصوت عالي نعم يا ختي؟! أنتي مديونة بسبعين ألف وعايزاني أديكي بتمانين تانية على الهوا؟ أنتي اتجننتي ولا جاية تنصبي عليا عين عينك؟
رديت عليه بثبات غريب، ثبات مكنتش أعرف إنه مستخبي جوايا اسمع للآخر يا معلم واحكم بالعدل! المحل دلوقتي ميت، لو قفلته مش هتعرف تاخد مليم، وجمال في الغربة لسه بيدور على شغل ومش بيبعت حاجة، يعني حتى لو حبسته هتاخد إيه؟ ورقة ملهاش قيمة، والمحل هيتقفل وحماتي ومحروس هيحطوا إيدهم على الجدران، وتطلع أنت بمليمين مخرومين بعد سنين محاكم. لكن لو نزلتلي بضاعة جديدة، أنا هعمل نظام تاني خالص.. الدكان ده هيتفتح من الفجر لوش الصبح، والمحل مكانه دهب في وسط الحارة ومفيش